രാവിലെ മുതല്‍ ബൂത്തുകളില്‍ നീണ്ട നിര

മഴയിലും പതറാതെ എറണാകുളം

കൊച്ചി:എറണാകുളം ജില്ല ഇക്കുറി പതിവു തെറ്റിച്ചു.മഴയിലും പതറാതെ ജനങ്ങള്‍ പോളിങ് ബൂത്തുകളിലേക്ക് ഒഴുകിതുടങ്ങിയതോടെ അക്ഷരാര്‍ഥത്തില്‍ ജനാധിപത്യത്തിന്റെ ഉല്‍സവമായി രംഗം കൊഴുത്തു. മുന്‍കാലങ്ങളില്‍ നിന്ന് വ്യത്യസ്തമായി മാതൃക പോളിങ് ബൂത്തുകളും വനിതകള്‍ മാത്രം നിയന്ത്രിക്കുന്ന പോളിങ് ബൂത്തുകളും ഈ ഉല്‍സവത്തെ കൂടുതല്‍ ജനകീയമാക്കിയെന്നുവേണം പറയാന്‍. 2011ലെ നിയമസഭ തിരഞ്ഞെടുപ്പിനെ അപേക്ഷിച്ച് ഇക്കുറി മികച്ച പോളിങ് ശതമാനമാണ് ജില്ലയില്‍ രേഖപ്പെടുത്തിയത്. പോളിങ് ശതമാനത്തിന്റെ അന്തിമകണക്കുകള്‍ വ്യക്തമായില്ലെങ്കിലും സൂചനകള്‍ ആ വഴിക്കാണ്. 

ജില്ലയില്‍ ഏറ്റവും കുറവ് വോട്ടര്‍മാരുള്ള രാമന്‍തുരുത്തിലെ താല്‍ക്കാലിക ഷെഡിലെ ബൂത്തില്‍ രണ്ട് വോട്ടര്‍മാരേയും കാത്ത് ജീവനക്കാര്‍ വൈകീട്ട് ആറു വരെയിരുന്നു.  ആകെയുള്ള 19 വോട്ടര്‍മാരില്‍ 10പേരും ഒരുമണിക്കുമുമ്പേ വോട്ടു ചെയ്തിരുന്നു.

പോളിങ് മന്ദഗതിയിലായ എറണാകുളത്തെ 67,68 ബൂത്തുകളില്‍ കണയന്നൂര്‍ ദഹസില്‍ദാരെത്തി സ്ഥിതി വിലയിരുത്തി. 67ല്‍ 1400 വോട്ടര്‍മാരില്‍ 510 പേര്‍ ഇതിനകം വോട്ടുചെയ്തിരുന്നു. നടപടിക്രമം വേഗത്തിലാക്കാന്‍ പ്രിസൈഡിങ് ഓഫീസറോട് ആവശ്യപ്പെടുകയായിരുന്നു. 

പറവൂര്‍ മണ്ഡലത്തിലെ കൈതാരംഗവ.വി.എച്ച്.എസിലെ രണ്ടു ബൂത്തിലും വനിതവോട്ടര്‍മാരുടെ നീണ്ടനിര കാണാമായിരുന്നു. കളമശേരി മണ്ഡലത്തിലെ ഈസ്‌റ്റേണ്‍ എം.ഇ.എസ്. സ്‌കൂളിലെ 97,100 ബൂത്തുകളില്‍ വൈകീട്ട് മൂന്നുമണിയോടെ ഭൂരിഭാഗം വോട്ടുകളും പോള്‍ചെയ്തിരുന്നു.

പൊതുവെ സമാധാനപരമായ അന്തരീക്ഷത്തില്‍ നടന്ന തിരഞ്ഞെടുപ്പില്‍ അനിഷ്ട സംഭവങ്ങളൊന്നും റിപ്പോര്‍ട്ട് ചെയ്തിട്ടില്ല. വൈകീട്ട് അഞ്ചുമണിയോടെ ജില്ലയിലെ വിവിധ മണ്ഡലങ്ങളിലായി 71.81 ശതമാനം പോളിങ് രേഖപ്പെടുത്തിയിരുന്നു. ഇക്കുറി ആറു മണിവരെയ വോട്ടിങ് സമയം ഉണ്ടായിരുന്നതിനാല്‍ അവസാനപോളിങ് ശതമാനം 80ന് അടുത്തെത്തുമെന്നാണ് കരുതുന്നത്. 

2011ല്‍ പോളിങ് ശതമാനം 77.63

ഇക്കുറിയത് 79.39 ആയി ഉയര്‍ന്നു

കൊച്ചി: 2011ല്‍ ജില്ലയിലെ ആകെ പോളിങ് ശതമാനം 77.63 ആയിരുന്നു.എന്നാലിക്കുറിയത് 79.39 ശതമാനമായി ഉയര്‍ത്താന്‍ കഴിഞ്ഞു. പ്രിസൈഡിങ് ഓഫീസര്‍മാരുടെ ഡയറി പരിശോധന പൂര്‍ത്തിയാകുന്നതോടെ ഈ കണക്കില്‍ ഇനിയും വ്യത്യാസം വരും.

2011ല്‍ സംസ്ഥാനത്ത് ഏറ്റവും കൂടുതല്‍ പോളിങ് ശതമാനമുള്ള ആദ്യനാലു ജില്ലകളില്‍ നാലാമതായിരുന്നു എറണാകുളം. 81.27 ശതമാനത്തോടെ  കോഴിക്കോട് ജില്ലയായിരുന്നു അന്ന് മുന്നില്‍. 80.66 ശതമാനത്തോടെ കണ്ണൂര്‍ രണ്ടാമതും 79.11 ശതമാനത്തോടെ ആലപ്പുഴ ജില്ലയുമാണ് എറണാകുളത്തിന് മുന്നിലുണ്ടായിരുന്നത്. 

ഉയര്‍ന്ന പോളിങ് കുന്നത്തുനാട്ടില്‍

കുറവ് എറണാകുളത്ത്

കൊച്ചി: പ്രാഥമിക ശതമാനക്കണക്ക് വന്ന മണ്ഡലങ്ങളിലെല്ലാം 2011ലേതിനേക്കാള്‍ പോളിങ് ശതമാനം കൂടിയിട്ടുണ്ട്. 2011ല്‍ പോളിങ് ശതമാനം 81.13 ആയിരുന്ന പെരുമ്പാവൂരില്‍ ഇക്കുറിയത് 83.80 ആയി. അങ്കമാലിയില്‍ 82.84 ശതമാനം പോളിങാണ് രേഖപ്പെടുത്തിയത്. കഴിഞ്ഞതവണയിത് 81.24 ശതമാനമായിരുന്നു. ആലുവയില്‍ 2011നെ അപേക്ഷിച്ച് പോളിങ് ശതമാനത്തില്‍ വര്‍ധനയുണ്ട്. അന്ന് 80.25 ആയിരുന്നത് ഇക്കുറി 82.97 ആയി. 

കളമശേരിയില്‍ 81.24 ശതമാനമാണ് പോളിങ്. 2011ലിത് 79.55 ശതമാനമായിരുന്നു. പറവൂരില്‍ 83.43 ശതമാനമാണ് പോളിങ്.  വൈപ്പിനില്‍ ഇക്കുറി പോളിങ് ശതമാനം 79.43 ആയിട്ടുണ്ട്. കഴിഞ്ഞതവണത്തേക്കാള്‍ അല്‍പ്പം കൂടി. 2011ല്‍ ഇവിടെ 79.26 ശതമാനം പോളിങാണ് രേഖപ്പെടുത്തിയത്. കഴിഞ്ഞതവണ ജില്ലയില്‍ ഏറ്റവും കുറവ് പോളിങ് ശതമാനം രേഖപ്പെടുത്തിയ കൊച്ചിയില്‍ ഇക്കുറി നല്ലമാറ്റമാണുണ്ടായിട്ടുള്ളത്. 2011ല്‍ പോളിങ് ശതമാനം 66.91 ആയിരുന്നത് ഇക്കുറി 72.09 ആയി ഉയര്‍ന്നു.

തൃപ്പൂണിത്തുറയില്‍ 76.20 പോളിങാണ് രേഖപ്പെടുത്തിയത്. 2011ല്‍ ഇത് 76.25 ആയിരുന്നു. കഴിഞ്ഞതവണത്തെ അപേക്ഷിച്ച് പോളിങ് ശതമാനത്തില്‍ നേരിയ കുറവുണ്ട്. എറണാകുളത്തും പോളിങ് ശതമാനം ഭേദപ്പെട്ടു. കഴിഞ്ഞതവണ 71.64 ആയിരുന്നത് ഇക്കുറി 72 ശതമാനമായിട്ടുണ്ട്. തൃക്കാക്കരയില്‍ 2011ല്‍ 73.62 ശതമാനമായിരുന്ന പോളിങ് ശതമാനം ഇക്കുറി 74.47 ആയി ഉയര്‍ന്നു. 

കുന്നത്തുനാട്ടില്‍ കഴിഞ്ഞ തവണത്തേക്കാള്‍ രണ്ടുശതമാനത്തോളം വോട്ടാണ് കൂടുതലായി രേഖപ്പെടുതത്തിയത്. 2011ല്‍ 83.36 ശതമാനമായിരുന്ന പോളിങ് ശതമാനം ഇക്കുറി 85.36 ആയി. പിറവത്ത് പോളിങ് കഴിഞ്ഞതവണ 79.08 ആയിരുന്നത് ഇക്കുറി 80.40 ശതമാനമായി ഉയര്‍ന്നു. മൂവാറ്റുപുഴയിലും മികച്ച പോളിങാണ് നടന്നത്. 79.04 ശതമാനം പോളിങ് രേഖപ്പെടുത്തിയപ്പോള്‍ കഴിഞ്ഞതവണയിത് 75.03 ആയിരുന്നു. കഴിഞ്ഞതവണ 74.12 പോളിങ് ശതമാനം രേഖപ്പെടുത്തിയ കോതമംഗലത്ത് മൂന്നുശതമാനത്തിലേറെ വോട്ടുകളാണ് ഇക്കുറി കൂടുതലായി പോള്‍ ചെയ്തത്. ഇക്കുറി പോളിങ് ശതമാനം 77.38 ആയാണ് ഉയര്‍ന്നത്. 

ജില്ലയില്‍ പോളിംഗ് കൂട്ടിയത് സ്വീപ്പ്: ജില്ല കളക്ടര്‍

 കൊച്ചി: സംസ്ഥാനത്ത് മറ്റു ജില്ലകളെ അപേക്ഷിച്ച് എറണാകുളം ജില്ലയില്‍ ഇക്കുറി പോളിംഗ് ശതമാനം ഉയര്‍ന്നതിനു പിന്നില്‍ ഫലപ്രദമായി നടത്തിയ വോട്ടര്‍ ബോധവത്കരണ(സ്വീപ്പ്)മാണെന്ന് ജില്ലാ തെരഞ്ഞെടുപ്പ് ഓഫീസര്‍ കൂടിയായ ജില്ലാ കളക്ടര്‍ എം. ജി. രാജമാണിക്യം പറഞ്ഞു. പലവിധത്തിലുള്ള ബോധവത്കരണ നടപടികള്‍ ആവിഷ്‌കരിച്ചു നടപ്പിലാക്കാന്‍ കഴിഞ്ഞു. ഈ പരിപാടികള്‍ക്കെല്ലാം വലിയ ജനപിന്തുണയാണു ലഭിച്ചത്. ഏറ്റവും പ്രധാനപ്പെട്ടത് ജില്ലാ കളക്ടര്‍ പുത്തന്‍ വോട്ടര്‍മാര്‍ക്ക് നേരിട്ട് കത്തെഴുതി എന്നതാണ്. ജനാധിപത്യ സംവിധാനത്തില്‍ വോട്ടെടുപ്പിന്റെ പ്രധാന്യം വിളിച്ചോതി സ്വന്തം കൈപ്പടയിലാണ് കളക്ടര്‍ കത്ത് എഴുതിയത്. ജില്ലയിലെ 50,000 പുത്തന്‍ വോട്ടര്‍മാര്‍ക്ക് ഈ കത്ത് ലഭിച്ചു. പലരും ഇതിന് നന്ദി പറഞ്ഞ് തനിക്ക് മറുപടി അയച്ചുതന്നതായി അദ്ദേഹം പറഞ്ഞു. കത്ത് ലഭിച്ച പുത്തന്‍വോട്ടര്‍മാര്‍ ഇതിന് സൂക്ഷിച്ചുവയ്ക്കുമെന്ന് ഉറപ്പാണ്. 

 തിരഞ്ഞെടുപ്പ് കമ്മീഷനും ജില്ല ഇന്‍ഫര്‍മേഷന്‍ ഓഫീസും ചേര്‍ന്ന് ആവിഷ്‌കരിച്ച വോട്ട് സന്ദേശ ബോധവത്കരണ പരിപാടിയായ വോട്ടുവണ്ടി പ്രദര്‍ശന യൂണിറ്റ് ജില്ലയുടെ മുക്കിലും മൂലയിലും പര്യടനം നടത്തി. വോട്ടിംഗ് യന്ത്രവും വിവിപാറ്റ് യന്ത്രവും ഒക്കെ ചേര്‍ത്ത് ഒരു പോളിംഗ് ബൂത്ത് തന്നെയാണു പ്രദര്‍ശന വാഹനത്തില്‍ ഒരുക്കിയിരുന്നത്. പ്രായഭേദമന്യേ ജനങ്ങള്‍ ഈ വാഹനത്തില്‍ തങ്ങളുടെ വോട്ടവകാശം പരീക്ഷിക്കുകയും ചെയ്തു. പ്രത്യേകിച്ചും പുത്തന്‍വോട്ടര്‍മാര്‍ക്ക് ഏറെ കൗതുകവും വിജ്ഞാനവും പകര്‍ന്നു. 

 ഇതു കൂടാതെ പോസ്റ്ററുകളും സ്റ്റിക്കറുകളുമൊക്കെ തയാറാക്കി വിതരണം ചെയ്തിരുന്നു. കുട്ടിപ്പോലീസംഗങ്ങളുടെ പരിശീലന പരിപാടിയില്‍ അവരെക്കൊണ്ട്  വീട്ടുകാരെ വോട്ടു ചെയ്യാന്‍ പ്രേരിപ്പിക്കുമെന്ന് പ്രതിജ്ഞയെടുപ്പിക്കുകയും ചെയ്തു. പിന്നീട് എറണാകുളം നഗരത്തില്‍ പൊതുജനങ്ങളെയും വിവിധ സര്‍ക്കാര്‍ വകുപ്പുകളെയും സംഘടിപ്പിച്ച് തെരുവുത്‌സവം എന്ന പേരില്‍ വോട്ട് ബോധവത്കരണ റാലിയും നടത്തി. 

 വോട്ടിംഗ് ശതമാനത്തില്‍ ഇപ്പോഴുണ്ടായിരിക്കുന്ന ഈ വര്‍ധന വളരെ അഭിമാനാര്‍ഹമാണെന്ന് ജില്ലാ കളക്ടര്‍ പറഞ്ഞു. ഭാവിയില്‍ ഇതില്‍ക്കൂടുതല്‍ പേര്‍ ജനാധിപത്യത്തില്‍ പങ്കാളികളാകാന്‍ മുന്നോട്ടുവരട്ടെയെന്ന് അദ്ദേഹം ആശംസിച്ചു.   

നോര്‍ത്ത് പോഞ്ഞാശേരി എല്‍.പി. സ്‌കൂള്‍ ബൂത്ത് നമ്പര്‍ 140;

ജില്ലയില്‍ ഏറ്റവുംകൂടുതല്‍ വോട്ടര്‍മാരുള്ള ബൂത്ത്

പെരുമ്പാവൂര്‍:  പെരുമ്പാവൂര്‍ നിയോജകമണ്ഡലത്തിന്റെ പരിധിയിലുള്‍പ്പെടുന്ന നോര്‍ത്ത് പോഞ്ഞാശേരി എല്‍.പി സ്‌കൂളിലെ 140-ാം നമ്പര്‍ ബൂത്താണ് ജില്ലയില്‍ ഏറ്റവും കൂടുതല്‍ വോട്ടര്‍മാരുള്‍പ്പെടുന്ന ബൂത്ത്. 104, 104അ, ,105 ബൂത്തുകളുള്‍പ്പെടുന്ന നോര്‍ത്ത് പോഞ്ഞാശേരി എല്‍.പി. സ്‌കൂളിലെ 104ാം നമ്പര്‍ ബൂത്തില്‍മാത്രം 1925 പേര്‍ക്കാണ് സമ്മതിദാനാവകാശമുണ്ടായിരുന്നത്. കഴിഞ്ഞ നിയമസഭാ തിരഞ്ഞെടുപ്പില്‍ 104 എന്ന ഒരു ബൂത്ത് മാത്രമേ ഉണ്ടായിരുന്നുള്ളു എന്നാല്‍ ആളുകളുടെ തിരക്കൊഴിവാക്കാന്‍ വേണ്ടിയാണ് 104, 104എ എന്നിങ്ങനെ രണ്ടു ബൂത്തുകളായി വേര്‍തിരിക്കുകയായിരുന്നു. 

ഉച്ചയ്ക്ക് ഒരുമണിവരെ 270 പുരുഷന്മാരും 290 സ്ത്രീകളുമുള്‍പ്പെടെ 560 പേരാണ് ഈ ബൂത്തില്‍ വോട്ട് രേഖപ്പെടുത്തിയത്. രാവിലെ പെയ്ത മഴ സമ്മതിദായകരെ ചെറുതായി വലച്ചെങ്കിലും ഉച്ചവരെ പോളിങ്ങ് സ്‌റ്റേഷനില്‍ പൊതുവെ തിരക്കനുഭവപ്പെട്ടെന്ന് സുരക്ഷാ ഉദ്യോഗസ്ഥര്‍ പറയുന്നു.104ാം നമ്പര്‍ ബൂത്തില്‍ ഒരു പ്രിസൈഡിങ്ങ് ഓഫീസറും നാല് പോളിങ്ങ് ഉദ്യോഗസ്ഥരും 104അ, 105 ബൂത്തുകളില്‍ ഒരു പ്രിസൈഡിങ്ങ് ഓഫീസറും മൂന്നുവിതം പോളിങ്ങ് ഉദ്യോഗസ്ഥരുമാണുണ്ടായത്.കൂടാതെ സ്‌പെഷ്യല്‍ പോലീസ് ഓഫീസര്‍മാരും ഇവരുടെ സഹായത്തിനായുണ്ടായിരുന്നു.

സമ്മതിദാനം വിനിയോഗിച്ച് 

രഞ്ജിനി ദാമ്പത്യത്തിലേക്ക്

കുമ്പളം:  തൃപ്പൂണിത്തുറ നിയോജകമണ്ഡലത്തിലെ കുമ്പളം ആര്‍പിഎം ഹയര്‍ സെക്കണ്ടറി സ്‌കൂളിലെ 74ാം നമ്പര്‍ ബൂത്തിലേക്കാണ് താലികെട്ട് കഴിഞ്ഞ് രഞ്ജിനി വലതുകാല്‍വച്ച് കയറിയത്.വരനുമായാണ് വോട്ടുചെയ്യാന്‍ എത്തിയത്.കന്നിവോട്ട് ചെയ്തതിന്റെയും സുമംഗലിയായതിന്റെയും സന്തോഷത്തിലായിരുന്നു രഞ്ജിനി.ഈ ബൂത്തില്‍ ആകെ 755 വോട്ടര്‍മാരാണുള്ളത്. 2 മണിവരെ 483പേര്‍ വോട്ട് രേഖപ്പെടുത്തി. ഈ സ്‌കൂളില്‍തന്നെ 72,73,74 എന്നിങ്ങനെ മൂന്ന് ബൂത്തുകളാണ് സജ്ജീകരിച്ചിരുന്നത്. രാവിലെ പെയ്ത മഴ പോളിങ്ങ് മന്ദഗതിയിലാക്കിയിരുന്നെങ്കിലും ഉച്ചയോടെ പോളിങ്ങ് ശതമാനം വര്‍ദ്ധിച്ചു. 

പോളിങ് ശതമാനം-ജില്ല 79.39

പെരുമ്പാവൂര്‍ 83.80 %.ആണ്‍72932 പെണ്‍71964.ആകെ 144896

അങ്കമാലി 82.85%.ആണ്‍67419 പെണ്‍68062.ആകെ 135481

ആലുവ 82.97 ആണ്‍72291,പെണ്‍74019 ആകെ 146310

കളമശേരി81.24.ആണ്‍76304, പെണ്‍78358.ആകെ 154662

പറവൂര്‍ 83.40- ആണ്‍-77474, പെണ്‍-81831. ആകെ 159305

വൈപ്പിന്‍79.43%. ആണ്‍64944, പെണ്‍65371.ആകെ 130315. 

കൊച്ചി72.09%. ആണ്‍62562, പെണ്‍60869.ആകെ 123431. 

തൃപ്പൂണിത്തുറ 76.20 ആണ്‍76108, പെണ്‍74761.ആകെ 150869.

എറണാകുളം72%. ആണ്‍55395, പെണ്‍55372.ആകെ 110767. 

തൃക്കാക്കര 74.47%. ആണ്‍67421,പെണ്‍67389. ആകെ 134810 

കുന്നത്തുനാട് 85.36%. ആണ്‍73344, പെണ്‍73798.ആകെ 147142 

പിറവം 80.40. ആണ്‍ 79337, പെണ്‍81181 ആകെ 160518.

മൂവാറ്റുപുഴ79.04.ആണ്‍71762, പെണ്‍68708 ആകെ 140470. 

കോതമംഗലം 77.38%. ആണ്‍ 63063, പെണ്‍60253 ആകെ 123316.